Gedanken zur Fastnacht

Es geht alles aah eenfach,
desdo wär doch gelacht ...

Pfarrer Winfried Anslinger am 2. März 2003

Aus dem Markusevangelium: An einem Sabbat hing Jesus durch die Kornfelder, und unterwegs rissen seine Jünger Ähren ab. Da sagen die Pharisäer zu ihm: Sieh dir an, was sie tun! Das ist doch am Sabbat verboten. Er antwortete: Habt ihr nie gelesen, was David getan hat, als er und seine Begleiter hungrig waren und nichts zu essen hatten - wie er zur Zeit des Hohenpriesters Abjatar in das Haus Gottes ging und die heiligen Brote aß, die außer den Priestern niemand essen darf, und auch seinen Begleitern davon gab? Und Jesus fügte hinzu: Der Sabbat ist für den Menschen da, nicht der Mensch für den Sabbat. Deshalb ist der Menschensohn Herr auch über den Sabbat.
(Mk 2,23-28)

Ihr Leit, wie war's doch einst ehedem
mit de Sproch alles eenfach und scheen unn bequem
Mer konnt mit de Wörter so schön formuliere,
und musste nit neideitsch unn modisch parliere.
Doch domit sieht's heit jo ganz annerschter aus:
es werd englisch schwaduddelt des halt kenner meh aus!

Die Kinner hann Dates unn meenen Termine,
Wann se Streit hann, gibt’s Trouble unn de Jens mailt der Tine
ob sie morge zum Music Park kommt, da gibt's Techno
die Getränke een Euro unn de Ex macht die Disco.

Awwer warum ehr Leit, so viel Unmus gemacht,
es geht alles aah eenfach, desdo wär doch gelacht ...

Deswee wird heit mol rischdisch gepreddischt wie früher,
wu die Leit noch geschwätzt hann ohn' Gema Gebühr.
Dobei hott schunn die Bibel Fremdwörter verbreit,
und aus allerlei Sproche ehrn Cocktail bereit:
"Evangelium", "Presbyter", der "Christenpflicht" Glick:
des geht alles uffs griechisch Gebabbels zurick
Hätt des Ganze net eener mol niedergeschriewe,
wär' des heilige Buch fascht ohn Inhalt gebliewe..
Die berühmteste Worte kennt heit jedes Kind,
"Halleluja" unn "Amen" "Coca Cola" "Absinth".

Zwar steht nix in de Bibel zu lese vum letschdern,
doch des iss net wichtich, mir sinn net vunn geschtern.
Würd' de Papst urbi orbi Coca Cola mit segne,
Könnts im Petersdom bei de Wandlunge Dollarschein regne
denn die Firma hot Kohle, es fehlt nur am Sege
unn den kann ihr halt nur so en Kirchemann gebe.

Also warum, ehr Leit, so viel Unmus gemacht,
es geht alles ganz eenfach, desdo wär doch gelacht.

Heit gebe ganz viele ihr Geld nur so weg
für Chicken, für Ketchup, Mac Donald's Big Mac.
Mitm Auto bequem fährt zum Schalter der Kunde,
kriegt den Fraß in die Dutt, wenn zu Ende die Runde.
So geht alles ganz schnell ohne koche und spüle
unn die Leit han mehr Zeit fer ihr Frühlingsgefühle.
Ja, do wunner ich mich, dass es eens noch nit gibt:
AAch die Kerch als Drive-In, mit ´m Schnellandachts Clip.

Denn mol ehrlich, de Sunndach, iss iwwerhaupt nit cool,
wenn's aah noch anfangt mit Kerch, des reißt kenner vumm Stuhl.
Weil dehemm aah nix laaft, kummt der Sunntagsfruscht uff:
des gibt kenn gut Feeling, kenner iss mehr gut druff.
Dann hilft bloß de Walkman, die Sounds möglichst laut,
dass es rumpelt unn scheppert unn de Kaffee versaut.

Doch die Kerch als Drive-Inn, des wer mol ebbes Neies,
do bleibt mer im Auto trinkt sei Alkoholfreies,
nee, do fahrt mer eninn, und iss glei wieder draus,
noch bevor man es merkt, iss die Sünd aus ehm raus.
Die Remigiusstrooß is Sunndachs las vellich verschdobbt
unn de Parre am Eigang, der macht wie gedoppt.
Die Gebet gibt es Eenfach, als Doppel und Dreifach,
an me Schalter verpackt in de Dutt macht's viel mehr Spaß.
Mit'm Singe geht's so, dass ä kleeni CD
fer zwee Euro und fuchzisch kummt beim BMW
in de Wechsler vun dere Ster - e – o – anlage
des blost geil aus de Whoofer die Bäss in de Mage.
De Morge gerett, fer de Dach uffgebaut,
Wann's dann rumpelt und scheppert un des Gründels versaut.

Also, warum ehr Leit, so viel Unmus gemacht,
es geht alles ganz eefach, desdo wär doch gelacht.

Jetzt hott Jesus jo aach viel vum Sunndach gehalte,
den die Judde bekanntlich als Sabbat gestalte.
Er is heit zwar bloß noch als Weekend bekannt,
doch mit Recht würd er sunscht noch als Wohltat genannt.
Wie se mol beim Spaziere durchs Weizefeld kummet
und natürlich vum Laafe der Bauch ihne grummelt,
hawwe enfach die Jünger sich Ähre geblickt
und aaschließend sich ums Bezahle gedrickt.
Jesus hot do nit lang ans Bestroofe gedacht,
fer was hot dann sein Vatter den Weize gemacht?
Dass kääner verhungert, des ist doch ganz klor,
des wees doch en jeder, aah am Sabbat bleibts wohr.

Wenn ehr Jesus als typischen Single mol seht,
der vum Koche und Haushalt net grad viel versteht,
dann is mer der Imbiss do völlig verständlich,
weil er war halt bloß Preddischer schließlich und endlich.

Zwar gabs do ach Fraue, wie's Martha ens war,
die hawwe die ganz Bloos versorgt mit ihr Waar.
Doch üwwer de Sunndach, do warn die dehemm,
do war des mol schwierig, unn sie krien als die Flemm.
Also deswee die Jünger sich herzhaft bediene,
denn wer wees schunn, wanns widder was gibt zum Verdiene.

Deshalb: warum ehr Leit, so viel Unmus gemacht,
es iss alles ganz eefach, dessdo wär doch gelacht.

Doch die strenge gesetzliche Hüter der Jude,
ware vellich verbohrt, halle sich fer die Gute.
"Wie beim Fast food sich einfach bequem zu bedienen,
ist von Gott nicht erlaubt!", und mit finschdere Miene
han die Schlauberger alle den Jesus verscholle,
wollte am heilische Sabbat ihm's Kneisje verbolle.

Dem Jesus wars vor so Banause nit bang,
drum losst er se kumme, wart ab, holt ä Stang,
zeigt druff uff die Felder "Fer wenn wachst'n des do?"
unn isses erlaubt, wenn de krank bischt zu froo,
ob eener dich heele derf, aah wann is Sunndach?"
Losst ehr's Rindvieh fortrenne, wann ´s üwwer de Zaun macht?
Was macht ehr, wann Sunndachs die Gees kriet ä Zickel,
hockt ehr eich dann vors Haus unn betrachte die Gickel?
Wie se kratze im Mischt un zum Himmel duun gucke,
wann's Haus im Sturm fortfliegt, duht ehr eich grad mol ducke?
So seht ehr grad aus, ehr staawische Brieder,
Moral fer die annre unn selwer kenn Hüter.

Hott der David vor Johre net ah sich bedient
amm Heilichtum, wu des geweihte Brot lieht?
Sei Leit hotte Hunger unn warn uff de Flucht,
wer hotten do Zeit, unn de Saul war enn Schuft ...
Ehr seid doch die erschte die abhaun wann's brenzlich.
Ehr fressen eich voll in de Faschdezeit gänzlich.
Ihr seid mir ä Vorbild fer annere Leit,
predischt Wasser und selwer sauft Wein die ganz Zeit.

"Jetzt macht, dass ehr fortkummt, sunscht krien ehr ins Kreiz,
was ich do in de Hand hab, ehr hann mich gereizt!"
Unn gucke mol wie se jetzt langsam verschwinne,
wie die Jünger jetzt lache unn kaue unn grinse.
Dess war emol rischdisch die Wohret gesaaht.
Des war schunn lang fällisch, mer freie uns grad.

Also, warum ehr Leit, so viel Unmus gemacht,
es iss alles ganz eefach, dessdo wer doch gelacht.

Unn was iss jetzt do die Moral vunn dem Ganze?
In de Kerch macht'n Danzsaal, wann ehr Luscht habt zum Danze.
Macht ä Krankehaus nin, wann s mol neetich sollt sinn,
ä Unnerkunft wu sich Leit ´kenne flüchte eninn.
Unn wann eich am Sunndach die Langweil fruschtriert,
mache selwer emitt, dass es rockt unn vibriert.
Denn besser die Leit kumme bei unn sinn frehlich,
alswiee alles iss ernscht und kenner wird mehr glickseelich.
Nix iss uff de Welt so erhabe unn heilisch,
dass mer net, fer die Hilf', dürft es nutze unn teilisch
mei Brot mit me Arme, iss es niemols verkehrt,
weil die Kerch iss fer eich do un nit umgekehrt.
Unn so wünsch ich mir ach wann mer wieder schwaduddle
uff deitsch, englisch denglisch, durch de Maa unn die Kuddle,
dass känner vergisst, was iss wichtich im Lewe
dass nemme iss gutt, awwer besser iss gewe.

Also, warum ehr Leit, so viel Unmus gemacht,
es alles ganz eefach, dessdo wär doch gelacht.

zurück

nach oben